Өскеменде Д. Серікбаев атындағы Шығыс Қазақстан техникалық университеті алаңында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясы мүшелерінің өңірге сапары аясында облыстың туристік сала өкілдерімен дөңгелек үстел өтті. Делегацияны Қазақстан Республикасы Премьер-Министрдің орынбасары – Мәдениет және ақпарат министрі, коалиция төрағасының орынбасары Аида Балаева бастап барды.
Талқылауға сондай-ақ Шығыс Қазақстан облыстық мәслихатының төрағасы, облыстық коалиция жетекшісі Денис Рыпаков, ҚР Парламенті Мәжілісінің депутаттары Лұқбек Тумашинов пен Сергей Пономарев, Қазақстан Республикасы Кәсіподақтар федерациясының төрағасы Сатыбалды Дәулеталин және өңірдің туристік бизнес өкілдері қатысты.
Аида Балаева жаңа Конституция жобасы адамның құқығы мен қауіпсіздігін, лайықты болашағын басты орынға қоятын сапалы жаңа даму моделін қалыптастыратынын атап өтті. Сонымен қатар ол мемлекеттілікті нығайтуға және елдің экономикалық өсімін қамтамасыз етуге берік құқықтық әрі институционалдық негіз қалайтынын жеткізді. Вице-премьер жаңа Конституция жобасында бекітілген құқықтық ортаның болжамдылығы, инвестициялардың қорғалуы және табиғи, мәдени мұраға ұқыпты қарау туристік сала үшін айрықша маңызға ие екенін жеткізді.
«Табиғатқа ұқыпты қарау қағидатын бекітудің мәні зор. Туристік сала үшін бұл стратегиялық маңызға ие. Қоршаған ортаны қорғау – тек экология мәселесі емес, бұл – ұлттық қауіпсіздік пен балаларымыздың болашағы. Табиғат – жай ғана экономикалық ресурс емес, ол – ұлттық болмысымыздың, тарихымыз бен мәдениетіміздің ажырамас бөлігі. Оны сақтау – міндетіміз, ал дұрыс дамыту – келер ұрпақ алдындағы жауапкершілігіміз. Туристік сала үшін, әсіресе болжамды ережелер мен сенім маңызды. Инвестор мен кәсіпкер құқықтық ортаның ашықтығына, меншік құқығының қорғалуына және мемлекеттік шешімдердің тұрақтылығына сенімді болуға тиіс», – деді Аида Балаева.
Өз кезегінде Лұқбек Тумашинов табиғи аумақтарды қорғай отырып, бизнестің инфрақұрылымға, сервиске және жаңа бағыттарға инвестиция салуына сенім беретін нақты құқықтық бағдарларсыз туризмнің орнықты өсімі мүмкін емес екенін айтты.
«Әсіресе Шығыс Қазақстан секілді бірегей өңірде табиғаттың қорғалуы, кәсіпкердің ертеңгі күнге сенімді болуы маңызды. Экотуристік соқпақтар, визит-орталықтар, сервис, жол, қауіпсіздік, цифрлық ілгерілету платформалары – бәрі де сенім мен болжамды ережелерге негізделеді. Егер Конституция табиғатқа ұқыпты қарауды және «Заң және Тәртіп» қағидатын бекітсе, бұл сала ұзақмерзімді даму мен инвестиция үшін берік негізге ие болады», – деді депутат.
Конституциялық реформа жөніндегі комиссия мүшесі Сергей Пономарев ұсынылып отырған бір палаталы парламент – Құрылтай моделіне жан-жақты тоқталып, өзгерістердің мәні тиімділікті арттыруда, артық бюрократияны азайтуда және сайланған депутаттардың жауапкершілігін күшейтуде екенін атап өтті.
Кездесу қорытындысы бойынша Шығыс Қазақстан облысының туристік сала өкілдері конституциялық реформаға қолдау білдіріп, алдағы референдумға азаматтардың қатысуы өңірлердің сенімі мен инвестициялық ахуалына, тұрақты дамуына тікелей ықпал ететінін атап өтті.
Кездесу қорытындысы бойынша Шығыс Қазақстан облысының туристік саласының өкілдері конституциялық реформаға қолдау білдіріп, алдағы референдумға азаматтардың қатысуы сенімге, инвестициялық ахуалға және өңірлердің тұрақты дамуына ықпал ететін тікелей ерік білдіру тетігі екенін атап өтті.
