«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының жұмысы Түркістан облысында жалғасты. Еңбек ұжымдары және тұрғындармен өткен кездесулерде жаңа Конституция жобасының мазмұны түсіндіріліп, оның адам құқықтарын қорғау, билік тармақтарының тепе-теңдігін күшейту, азаматтық қоғамның рөлін арттыру және экономикалық өсімге берік құқықтық негіз қалыптастырудағы маңызына ерекше назар аударылды.
Сапар аясында Коалиция мүшелері Парламент Мәжілісінің депутаты Темір Қырықбаев, Сәкен Бибосынов, облыстық мәслихат депутаттары Нұржан Аширов, Ханай Әшірбеков, Ғалымжан Елшібай Төлеби және Қазығұрт аудандарын тұрғындарымен, еңбек ұжымдарымен, білім беру және спорт саласының өкілдерімен, кәсіпкерлермен кездесулер өткізіп, жаңа Конституцияның басты құндылықтары туралы сарапшылық ойларымен бөлісті.
Коалиция мүшелері Төлеби ауданы, Леңгір қаласындағы №8 колледжде аудан ұстаздарымен кездесу өткізіп, жаңа Конституция жобасының қоғамға берер артықшылықтары мен жаңашыл бағыттарын талқылады. Жиында Конституцияның еліміздің дамуындағы стратегиялық рөлі, білім беру жүйесіне тигізер ықпалы айтылды.
Жаңа Конституция елдің құқықтық негізін жаңғыртумен қатар, Қазақстанды білімге, ғылымға және жоғары технологияларға сүйенген заманауи мемлекет ретінде дамытуға бағытталған стратегиялық құжат екенін Парламент Мәжілісінің депутаты Темір Қырықбаев айтты.
«Жаңа Ата Заңда адами капиталды дамытуға, зияткер ұлт қалыптастыруға және цифрлық дәуір талаптарына жауап беретін құқықтық орта құруға ерекше мән беріліп отыр. Бүгінде әлем жасанды интеллект, үлкен деректер, цифрландыру және автоматтандыру кезеңіне қадам басты. Бұл үдерістер қоғам өмірінің барлық саласына әсер етуде. Осыған байланысты жаңа Конституцияда сапалы білім алуға тең қолжетімділікті қамтамасыз ету, ғылымды жүйелі қолдау, инновациялық экожүйені дамыту және технологиялық кәсіпкерлікті ынталандыру мемлекеттің маңызды міндеттерінің бірі ретінде қарастырылуда», – деді.
Кездесу барысында Конституцияда білім беру жүйесін жетілдіруге бағытталған құқықтық мүмкіндіктер сөз болды. Мұғалімдердің кәсіби дамуына, оқу процесін сапалы ұйымдастыруға, педагогикалық бастамаларды қолдауға арналған жаңа нормалар қарастырылғаны атап өтілді.
«Жаңа Конституциялық қағидаттар білім беру жүйесін жаңғыртуға, заманауи дағдыларды меңгерген, сыни ойлайтын, цифрлық сауатты ұрпақ тәрбиелеуге құқықтық негіз қалыптастырады. Сонымен қатар құжатта азаматтардың цифрлық құқықтарын қорғау да маңызды бағыттардың бірі ретінде қарастырылды. Цифрлық ортадағы жеке деректердің қауіпсіздігі, ақпараттық қауіпсіздік, онлайн кеңістіктегі құқықтардың сақталуы – заманауи мемлекеттің басты міндеттерінің қатарында», – деді облыстық мәслихат депутаты Ғалымжан Елшібай.
Осы аудандағы жұмыс сапары аясында Жалпыұлттық коалиция мүшелері «Fish House» ЖШС-нің балық шаруашылығында болып, жұмысшылармен және жергілікті кәсіпкерлермен кездесу өткізді. Жиын барысында Конституция елдің тұрақты дамуына, ауылдық және су ресурстарын тиімді пайдалануға, сондай-ақ кәсіпкерлер мен еңбеккерлердің құқықтарын қорғауға қосар үлесі атап өтілді.
«Жаңа Конституцияда экономикалық бастамаларды қолдауға мүмкіндік беретін құқықтық нормалар қарастырылды. Ол кәсіпкерліктің дамуы мен отандық тауар өндірушілер құқықтықтарының қорғалуына серпін береді. Сонымен қатар Ата Заң жобасында еңбек адамының құқықтары мен әлеуметтік қорғалуына ерекше мән берілді. Жұмысшылардың қауіпсіз еңбек жағдайлары, олардың әлеуметтік кепілдіктері мемлекеттің басты назарында болады. Конституциялық нормаларда су ресурстарын ұтымды пайдалану, экологиялық тұрақтылықты қамтамасыз ету және табиғатты қорғау да қамтылып, жаңа сипаттағы құқықтық талаптар бекітілді», – деді облыстық мәслихат депутаты Ханай Әшірбеков.
Коалиция өкілдерінің жұмыс сапары әрі қарай Қазығұрт ауданында жалғасты. Қазығұрт ауылындағы ардагерлер үйінде аға буын және зиялы қауым өкілдерімен кездесу өткізіліп, Конституцияның тұрақтылық пен құқықтық мемлекет құрудағы рөлі, азаматтардың құқықтары мен әлеуметтік қорғалуын қамтамасыз ету мүмкіндіктері айтылды.
Түркістан облыстық мәслихатының депутаты Нұржан Аширов Конституцияда көрініс тапқан «Халық үніне құлақ асатын мемлекет» қағидаты мемлекеттік шешімдер қабылдау үдерісінде азаматтық қатысуды кеңейтіп, қоғамдағы диалогты күшейтіп отырғанын жеткізді.
«Күшті мемлекет – ең алдымен заң үстемдігіне сүйенген мемлекет. жаңа Конституция әр азаматтың қадір-қасиетін қорғауға, қоғамдағы әділдікті нығайтуға және елдің тұрақты дамуына берік құқықтық негіз қалыптастыруға бағытталды. Бұл құжат «Мемлекет адам үшін» қағидатын нақты тетіктер арқылы жүзеге асыруды көздейді. Әр азаматтың әлеуметтік қорғалуы, лайықты өмір сүруі, еңбек пен зейнеттің қадірленуі – оның басты басымдығы», – деді.
Ал осы ауылдағы «Жеңіс» спорт кешенінде коалиция мүшелері аудан спортшыларымен және тұрғындармен кездесу өткізді. Басқосуда Ата Заң жобасының қоғамға, спорт саласына және жастар тәрбиесіне тигізер маңызы талқыланды. Жиын барысында Конституция азаматтардың құқықтары мен мүмкіндіктерін кеңейтетіні, сонымен қатар елдің тұрақты дамуына, әділетті қоғам құруға қосар үлесі айтылды.
Сондай-ақ кездесу барысында жаңа Конституцияда жастардың салауатты өмір салтын қалыптастыруға, спорт инфрақұрылымын дамытуға және спортшылардың кәсіби дамуына құқықтық негіз қалыптастырылғаны атап өтілді. Бұл – спортшыларға кәсіби дайындықты жетілдіруге, жарыстарға қатысуға және жеке жетістіктерге қол жеткізуге мүмкіндік беретін маңызды бағыт екеніне ерекше назар аударылды.
