«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері Батыс Қазақстан облысына қарасты Ақжайық және Бәйтерек аудандарына барып, жаңа Конституция жобасын жан-жақты талқылады. Әңгімелесу барысында өңірдің тұрақты дамуы, азық-түлік қауіпсіздігі және этносаралық келісім мәселелеріне баса мән берілді.
Коалиция мүшелері әлеуметтік сала қызметкерлерімен, ауыл шаруашылығы саласының мамандарымен, этно-мәдени бірлестіктердің өкілдерімен кездесті.
Чапаево ауылындағы мәдениет үйінде әлеуметтік сала өкілдерімен өткен кездесуде адам капиталына басымдық беру, цифрлық деректерді қорғау, экологиялық мәдениет қалыптастыру тақырыптары қозғалды. Жалпыұлттық коалиция мүшесі, Сенат депутаты Арман Өтеғұлов Конституцияда ауылдағы еңбек адамының әлеуметтік тұрғыда қорғалуына кепілдік берілгенін атап өтті.
«Жаңа Конституция жобасында ауыл шаруашылығы саласы еңбеккерлерін қорғау тетіктерін дамыту, техниканы жаңғырту, жарақаттану мен кәсіптік ауруларды азайту, сондай-ақ өндірістік қауіпсіздіктің қазіргі заманғы стандарттарын енгізу мәселелері қаралған. Сондай-ақ бұл құжат еңбекақы төлеудің ашықтығына, жұмыспен қамтуды заңдастыруға, аграрлық және ауыл шаруашылығы салаларындағы көлеңкелі секторды қысқартуға қатысты қойылатын талаптарды күшейтеді. Еңбек адамдары үшін бұл неғұрлым тұрақты табысты, зейнетақы жинақтарына және медициналық сақтандыру жүйесіне неғұрлым кең қолжетімділікті білдіреді», – деді ол.
Бұдан соң Бударин ауылында тұрғындармен өткен кездесуде әлеуметтік салаға басымдық берілді. Коалиция мүшесі, қалалық мәслихат депутаты Азима Губашева әлеуметтік кепілдіктерді Конституция деңгейінде бекіту қадамы мемлекеттің халық алдындағы жауапкершілігін күшейтетінін айтты.
«Білім беру жүйесіндегі кәсіби еркіндік заң жүзінде бекітіліп отыр. Мемлекеттік және жекеменшік оқу орындары үшін бірыңғай стандарттар, сондай-ақ білім беру жүйесінің зайырлы сипаты барлық педагогтарға тең кәсіби талаптар қамтамасыз етілетіні жаңа Конституцияда анық көрсетіліп отыр. Бұл ұрпақ тәрбиелеп отырған ұлағатты ұстаздардың мәртебесі биіктей беретінінің тағы бір кепілі», – деді ол.
Кейін Коалиция мүшелері Бәйтерек ауданында орналасқан «KAZMEAT Ақжайық» ЖШС цехында еңбек ететін жұмысшылармен кездесті. Коалиция мүшесі Айдарбек Айтпукешев жаңа Конституцияда адамның өзі, оның өмірі, құқығы мен бостандығы мемлекеттің ең жоғары құндылығы ретінде айқындалғанын мәлімдеді.
«Еңбек қауіпсіздігі – жұмысшының жеке жауапкершілігі емес, мемлекеттің міндеті. Конституция еңбек қауіпсіздігі мен гигиеналық талаптарға сай келетін жағдайларда еңбек ету құқығына кепілдік береді. Бұл өндіріс орнында адамның өмірі мен денсаулығына қатысты қандай да бір тәуекел енді мамандық ерекшелігімен немесе экономикалық тұрғыда тиімділікпен ақталмайтынын білдіреді. Жарақаттарды, апаттар мен кәсіби ауруларды болдырмау мәселесі бойынша жауапкершілік мемлекет пен жұмыс берушіге жүктеледі. Еңбек адамы тәуекелге бел бууға міндетті емес және қауіпсіздік техникасының сақталуын, қорғаныс құралдарымен қамтамасыз етілуін және лайықты еңбек жағдайын талап етуге құқылы», – деді ол.
Коалиция мүшелерінің жұмыс сапары Щапов ауылында зиялы қауыммен, этномәдени бірлестіктердің өкілдерімен өткен кездесуде қорытындыланды. Аудандық мәслихат төрағасы Нұрлыбек Хайруллин Ата Заңда барлық бағытқа қатысты мәселелер қамтылғанына тоқталды.
«Халық Кеңесінің құрамына этномәдени бірлестіктер енетіні бізді қуантады. Осы қисында этномәдени бірлестіктердің қызметі қоғамдық диалог арнасы ретінде қабылданып, институционалдық маңызы бар сипатқа ие болуда», – деді ол.
Осылайша, аталған аудандарда өткен кездесулер жаңа Конституция жобасының ерекшеліктерін тұрғындарға жан-жақты жеткізуге мүмкіндік берді.
