Бүгін өңірлік «Әділетті және Прогрессивті Қазақстанның Халықтық Конституциясы үшін!» жалпыұлттық коалициясының мүшелері Жамбыл облыстық қазақ және орыс драма театры ұжымымен кездесу өткізді.
Кездесу барысында жаңа Конституцияның басым бағыттары кеңінен түсіндіріліп, 15 наурыз күні ел болашағы үшін дауыс берудің маңыздылығы айтылды.
Жиында коалиция мүшелері Ата Заң жобасының адамға бағдарланған сипатқа ие екенін атап өтті. Құжатта ұлттық болмысқа, тарихи даму жолына және қоғам құндылықтарына басымдық берілгені жеткізілді. Сонымен қатар, Конституциядағы маңызды бағыттардың бірі ретінде цифрландыру мәселесі ерекше аталды. Атап айтқанда, құжат мәтінінде алғаш рет азаматтардың цифрлық ортадағы құқықтарын қорғау нормасы бекітілгені айтылды.
Коалиция мүшелері Гулам Умаров, Үміт Битенова және Дина Кульбаева Конституцияда ғылыми қауымдастық, білім беру саласы және зейнеткерлерге қатысты қарастырылған бастамаларға тоқталды.
«Конституцияда ғылым мен білім беру саласына ерекше мән берілуі – еліміздің болашағына салынған инвестиция. Ғылыми қауымдастыққа нақты қолдау көрсетілмейінше, инновациялық даму туралы айту қиын. Біз жас ғалымдарға мүмкіндік беріп, зерттеулерді өндіріспен ұштастыруымыз керек. Сонымен қатар, білім беру жүйесі заман талабына сай жаңарып, академиялық еркіндік пен сапаға басымдық берілуі тиіс. Ал зейнеткерлерге қатысты бастамалар әлеуметтік әділеттілікті нығайтып, олардың лайықты өмір сүруіне жағдай жасауға бағытталуы қажет. Конституциялық деңгейде бұл кепілдіктердің бекітілуі – қоғамның барлық тобына тең мүмкіндік берудің айқын көрінісі», – деді Гулам Умаров.
Өңірлік коалиция жетекшісі Дауыл Бейсенқұлов өз сөзінде Конституцияда өнер адамдарына қатысты нақты нормалар қамтылып, олардың құқықтары мен мүдделері қорғалатыны айқын көрсетілгенін атап өтті.
«Конституцияда өнер адамдарына қатысты нақты нормалардың қамтылуы – мәдениет саласына көрсетілген ерекше құрметтің белгісі. Өнер иелерінің құқықтары мен заңды мүдделерінің қорғалуы мемлекет тарапынан нақты кепілдікке ие болуы тиіс. Бұл – шығармашылық еркіндікті сақтаудың, ұлттық мәдениетті дамыту мен қолдаудың маңызды тетігі. Өнер адамдары қоғамның рухани тірегі болғандықтан, олардың әлеуметтік жағдайы мен кәсіби қызметіне қатысты мәселелер Конституциялық деңгейде айқындалуы – әділетті шешім», – деді Дауыл Бейсенқұлов.
Жиын қорытындысында коалиция мүшелері театр ұжымын 15 наурыз күні ел болашағы үшін дауыс беруге шақырды.
