«Әділ және Прогрессивті Қазақстанның Халықтық Конституциясы үшін!» жалпыұлттық коалициясының өкілдері М. Өтемісов атындағы Батыс Қазақстан университетінің профессор-оқытушылар құрамымен және студенттерімен кездесті. Делегацияны Премьер-Министрдің орынбасары – Қазақстан Республикасы Мәдениет және ақпарат министрі, Жалпыұлттық коалиция төрағасының орынбасары Аида Балаева бастап барды. Іс-шараға ҚР Парламентінің депутаттары, Конституциялық реформа комиссиясының мүшелері және басқа да тұлғалар қатысты.
Кездесу барысында Премьер-министрдің орынбасары жаңа Конституция жобасы Қазақстанның білім беруді дамыту және адам капиталының рөлін арттыру бағытындағы стратегиялық бағдарын көрсететінін айтты. Осыған орай ілім беру, ғылым, мәдениет және инновациялар басты басымдықтар ретінде айқындалды.
«Қазіргі таңда әлемдік тәжірибе көрсетіп отырғандай, тұрақты экономикалық өсімге қол жеткізген мемлекеттер ең алдымен білім беру жүйесіне инвестиция салып, ғылыми-зерттеу қызметін қолдауға басымдық берген. Себебі жоғары технологиялық өндірістер, цифрлық экономика және креативті индустрия дәл осы адами капиталдың сапасына негізделеді. Ғылым мен инновацияны дамыту – экономиканы әртараптандырудың басты тетіктерінің бірі. Бұл жаңа өндірістерді қалыптастыруға, технологиялық тәуелсіздікті қамтамасыз етуге және ұлттық экономиканың бәсекеге қабілеттілігін арттыруға мүмкіндік береді. Осы ретте жаңа Конституция жобасында білім, ғылым, мәдениет және инновация салаларына ерекше көңіл бөлінуі – Қазақстанның білімге негізделген экономика құруға бағытталған стратегиялық таңдауының айқын көрінісі деп білемін. Бұл жоғары білім беру жүйесінің сапасын арттыруға, ғылыми зерттеулердің нәтижелілігін көтеруге және инновациялық экожүйені дамытуға бағытталған институционалдық өзгерістердің құқықтық негізін қалайды», – деді А. Балаева.
Сонымен қатар Үкімет басшысының орынбасары жаңа Конституцияда елдің болашағын айқындайтын адам, оның білімі, құзыреттілігі және әлеуеті даму моделінің ортасына қойылатындығын және осы бағытта елдің дамуының жаңа кезеңіне өтудің заңды негіздері қарастырылғанын атап өтті.
«Жаңа Конституция жобасында да мемлекеттік саясаттың өзегі – адам және адам әлеуеті екені нақты айқындалған. Бұл – еліміздің даму моделінің түбегейлі жаңғыруын білдіретін маңызды ұстаным. Себебі қазіргі жаһандық бәсекелестік жағдайында табысты даму білімге, ғылымға және технологиялық прогреске негізделген адами әлеуеттің сапасына тәуелді. Осы тұрғыда жаңа Конституция жобасының 3-бабының 2-тармағында: «Қазақстан Республикасы адами капиталды, білімді, ғылымды және инновацияны дамытуды мемлекет қызметінің стратегиялық бағыты деп таниды» деп нақты көрсетілген. Бұл норма ендігі жерде білім беру жүйесін дамыту, ғылыми зерттеулерді қолдау және инновациялық бастамаларды ілгерілету тек әлеуметтік саясаттың бір бағыты ғана емес, ұлттық дамудың негізгі стратегиялық басымдығына айналатынын білдіреді. Яғни, мемлекет болашағы ең алдымен азаматтардың зияткерлік әлеуетіне, кәсіби даярлығына және шығармашылық мүмкіндіктеріне тәуелді болады. Басқаша айтқанда, XXI ғасырдағы басты капитал – бұл білімді, білікті және жаңашыл ойлайтын адам», – деп түйіндеді Премьер-министрдің орынбасары.
Мәжіліс депутаты Серік Егізбаев конституциялық реформа соңғы жылдардағы ауқымды саяси өзгерістердің логикалық жалғасы болғанын және қоғамның сұранысы негізінде қалыптасқанын атап өтті. Оның айтуынша, цифрлық мемлекеттік платформалар арқылы көптеген ұсыныс түсті, бұл азаматтардың құжатты әзірлеуге белсенді қатысқанын айқын көрсетті және жобаның шынайы «халықтық» сипаты туралы айтуға негіз болды.
Қазіргі заман қатеріне тоқтала келе, Мәжіліс депутаты Сергей Пономарев цифрлық күн тәртібіне және мемлекетінің онлайн ортадағы жауапкершілігіне, сондай-ақ жобада экологиялық нормалардың күшейтілуіне ерекше мән берді.
«Бүгін біз әлеуметтік желіде хат алмасу және жеке деректерді қорғау құқығын конституциялық деңгейде бекітеміз. Маңыздысы, мемлекет тек офлайн ғана емес, онлайн да бізді қорғауға міндеттеледі. Сонымен қатар, жобада экологиялық бағыт күшейтілген: енді табиғатқа деген сүйіспеншілікті тек сөзбен айту жеткіліксіз – оны қорғап, сақтауға міндеттіміз, ал қоршаған ортаға зиян келтіргені үшін жауапкершілік қарастырылған», – деп атап өтті ол.
Филология факультетінің аға оқытушысы, айтыскер Жансая Мусина қоғамдық келісім, заңның үстемдігі және жастарды білім мен ұлттық құндылықтар негізінде тәрбиелеудің маңызына тоқталды.
«Конституция – бұл тек заңдар жинағы емес. Бұл мемлекеттің тірегі, біздің тәуелсіздігіміздің айғағы және әрбір азаматтың құқығы мен бостандығын қорғайтын негізгі құжат. Сондықтан жаңа Ата заңымыз – елдің болашағына негізделген мықты іргетас және біз осы бастамаларды қолдаймыз», – деді ол.
Жастар атынан 3-курс студенті, «Биология» мамандығының студенті Гүлназ Есқайырова сөз сөйлеп, білім беру мен ғылым саласындағы басымдықтардың жастар үшін болашаққа жасалатын инвестиция және өзін-өзі дамытуға жаңа мүмкіндіктер ашатынын айтты.
Кездесу барысында студенттер тарапынан білімді насихаттауға және қоршаған ортаға жауапкершілікпен қарауға бағытталған экологиялық және ағартушылық жобалар сияқты бастамалар көтерілді. Қатысушылар жаңа Конституция жобасы қоғамда қызу талқыға түсіп, елдің болашағын айқындаудың басты негізіне айналғанын атап өтті.
