Бүгін Степногорск қаласындағы кәсіпорындар мен ұйымдардың қызметкерлерімен бірқатар кездесу өткізілді. Аталған кездесулер жаңа Конституцияны қабылдау бойынша 15 наурызда өтетін республикалық референдум қарсаңында ұйымдастырылды. Іс-шаралар ашық диалог форматында өтті. Онда коммуналдық сала қызметкерлерінен бастап, мәдениет саласының өкілдеріне дейінгі түрлі мамандық иелері қамтылды.
Кездесулерге Жалпыұлттық коалицияның мүшелері – Мәжіліс Төрағасының орынбасары Альберт Рау, Ақмола облыстық мәслихатының депутаты Марат Қойшыбаев, сондай-ақ Степногорск қалалық мәслихатының төрағасы Олжас Жағыпаров қатысты.
Ең алдымен коалиция өкілдері «Степногорск-водоканал» ШЖҚ МКК ұжымымен әңгімелесті. Кәсіпорын қызметкерлері жаңа Конституцияның негізгі ережелеріне қатысты өздерін толғандырған сұрақтарын қойды. Коалиция өкілдері бұл құжат мемлекеттің әлеуметтік-экономикалық дамуына, әлеуметтік әділдік қағидаттарын нығайтуға және азаматтардың құқығын қорғауға ықпал ететінін жан-жақты түсіндірді.
Бұдан соң «Viamedis» ЖШС ұжымымен кездесу өтті. Талқылау барысында конституциялық өзгерістер азаматтардың қоғам өміріне атсалысуын арттыруға, тұрақты өсімге жағдай жасауға және мемлекеттік институттарға деген сенімді нығайтуға ықпал ететініне ерекше назар аударылды.
Сондай-ақ Коалиция өкілдері «Горняк» демалыс және мәдениет орталығында жұртшылықпен жүздесті. Мұнда азаматтардың референдумға қатысуы, ашық коммуникация және қоғамның анық ақпарат алуының мемлекет болашағын қалыптастырудағы рөлі талқыланды.
Мәжіліс Төрағасының орынбасары Альберт Рау жаңа Конституция мемлекеттің стратегиялық даму бағытын айқындайтынын атап өтті.
«Жаңа Конституция – Республикамыздың алдағы өркендеу жолының берік негізі. Азаматтардың референдумға қаншалықты белсенді әрі саналы түрде қатысатыны әлеуметтік әділдік қағидаттарының нығаюына, адам құқықтарының қорғалуына және мемлекеттік жүйенің тұрақтылығына тікелей әсер етеді. Әрбір азамат ұсынылып отырған өзгерістердің мазмұнын толық түсініп, саналы түрде таңдау жасауы – аса маңызды», – деді Альберт Рау.
Өз кезегінде Марат Қойшыбаев еңбек ұжымдарымен ашық диалог орнатудың маңызын атап өтті:
«Конституциялық өзгерістер мемлекеттік басқарудың тиімділігін арттыруға және азаматтардың шешім қабылдау үдерісіне қатысуын кеңейтуге бағытталған. Мұндай кездесулер өзекті мәселелерді талқылап, түсіндіру жұмысын жүргізуге мүмкіндік береді. Дәл осындай бүкпесіз ашық әңгімелесу арқылы қоғам сенімі қалыптасады», – деді Марат Қойшыбаев.
Барлық кездесу сындарлы пікір алмасу форматында өтті: кәсіпорын қызметкерлері мен мәдениет саласының өкілдері өздерін толғандырған сұрақтарға жауап алып, конституциялық реформалардың негізгі бағыттарын талқылады және азаматтардың референдумға саналы түрде қатысуының маңызын атап өтті.
