Павлодар облысының Тереңкөл ауданына «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері сапармен барып, бірқатар кездесу өткізді. Іс-шараларға еңбек ұжымдары, денсаулық сақтау саласы қызметкерлері, кәсіпкерлер және тұрғындар қатысты. Қатысушылар заң формулировкасынан гөрі жаңа Конституцияның адамдар өміріне қалай әсер ететініне мән берді. Әсіресе жалақы деңгейі, еңбек қауіпсіздігі, денсаулық сақтау жүйесінің дамуы және ауылдық аймақтардың жаңғыруы басты тақырып болды.
Әлеуметтік-экономикалық даму, жергілікті өзін-өзі басқару және ауылдық жерде конституциялық нормаларды қолданудың практикалық мәселелері талқыланған ашық диалог Қызылтан ауылында өтті. Сондай-ақ кездесу барысында ауыл тұрғындары инфрақұрылым, жұмыспен қамту және өмір сапасы тақырыптарын көтерді. Коалиция өкілдері шешім қабылдау үдерісінде азаматтардың пікірі ескерілуі маңызды рөл атқаратынын атап өтті.
Коалиция мүшелерінің жаңа Ата заң нормаларын түсіндіру жұмысы аясында Песчан ауылдық округіндегі жүзден астам адам еңбек ететін жөндеу-механикалық зауытта еңбек қауіпсіздігі және тұрақты табыс төңірегінде әңгіме өрбіді. Қатысушылар конституциялық өзгерістер мемлекеттік саясаттың әлеуметтік бағытын күшейтетінін және еңбек адамының басымдығын бекітетінін атап өтті.
Жаңа Конституция нормаларына сәйкес, экономикалық даму принципі қызметкерлердің өмірі мен денсаулығына зиян келтірілмеуі керек. Ал өндіріс қызметі жергілікті қауымдастықтар мен инфрақұрылымның дамуына оң әсер етуге тиіс.
«Бұл дегеніміз – адамның денсаулығы өндірістік көрсеткіштерден жоғары қойылады, ал лайықты жалақы тек келісім емес, міндетті нормаға айналады. Ерекше атап өткім келеді: егер жер және оның қойнауы халыққа тиесілі болса, өндірістен түскен табыс та жол, жарықтандыру және әлеуметтік инфрақұрылым түрінде ауылдарға кері қайтарылуға тиіс», – деді Сенат депутаты Ернұр Айткенов.
Тереңкөлдің орталық ауруханасында өткен кездесуде медицина қызметкерлерінің мәртебесін қорғау, жауапкершілікті сақтандыру, демалыс құқығы және әділ жұмыс жүктемесі мәселелеріне ерекше көңіл бөлінді. Жиын барысында жаңа конституциялық нормалар науқастармен қатар медицина қызметкерлерінің де құқықтық қорғалуын күшейтетіні, әсіресе цифрландыру жағдайында дербес деректер қауіпсіздігінің маңызы артқаны айтылды.
Коалиция мүшесі Рымбек Қабиденов атап өткендей, цифрландыру жағдайында науқастардың дербес деректерін қорғау маңызды. Сонымен қатар ауыл медицинасын дамыту, медициналық пункттерді жаңғырту және ауруханаларды жабдықтау Ата заң деңгейінде қолдау табатыны, яғни аудан тұрғындарына көрсетілетін медициналық көмектің сапасы қалалық деңгеймен тең болуға тиіс екені айтылды.
Тереңкөл ауданының кәсіпкерлерімен өткен кездесуде диалог іскерлік әрі сындарлы сипатта өтті. Шағын және орта бизнес өкілдері кәсіпкерлік қызметтің құқықтық қорғалуы, салық саясатының тұрақтылығы және өндіріс пен сауданы дамытуға қолайлы әрі болжамды жағдай қалыптастыру мәселелерін талқылады.
Конституцияда бекітілген жеке меншік кепілдігі, экономикалық бастама еркіндігі және отандық өндірушілерді қолдау шараларына ерекше назар аударылды. Кездесуге қатысушылардың пікірінше, бизнесті ашық және тұрақты жүргізу ережелері – инвестициялық белсенділік пен аудан экономикасының өсуінің негізгі факторы.
Іс-шаралар қорытындысы бойынша коалиция өкілдері ауылдық аймақтар үшін Конституция жай декларация емес, мемлекеттің әлеуметтік міндеттерінің нақты тетігі екенін атап өтті.
«Сапалы медицина, заманауи мектептер, мұғалімдер мен дәрігерлерді қорғау – бұл уәде емес, заң нормасы. 15 наурызда біз ауылдың және балалардың болашағы үшін дауыс береміз», – деді коалиция мүшесі Гүлмира Нұрханова.
Лайықты еңбекақы мен қауіпсіздікке кепілдік беру мәселесі міндетті норма ретінде бекітіледі. Осылайша, жаңа Конституция зауыттағы жұмысшы үшін де, ауруханадағы дәрігер үшін де қорғаныс кепіліне айналады. Кездесулерге қатысушылар осындай ортақ пікірге келді.
