Қарағанды облысында жаңа Конституцияны талқылау мақсатында өңірдің жетекші кәсіпорындары мен мекемелерінің еңбек ұжымдары «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясы өкілдерімен кездесті. Жиындарда жаңа Конституцияның ережелері, негізгі басымдықтары және ашық әрі сындарлы диалог қалыптастыру мәселелері талқыланды.
Аталған топ құрамында Мәжіліс депутаты Тілектес Адамбеков, Қарағанды облыстық мәслихатының депутаты Рысқали Әбдікеров, «Ауыл» партиясы облыстық филиалының төрағасы Руслан Никонович және «Жоғары спорт шеберлігі мектебі» КММ жетекшісі Темірхан Абылаев болды.
Олар алдымен Осакаров ауданының ауыл шаруашылығы тауарын өндірушілерімен кездесті. Іс-шара Осакаровка кентіндегі Мәдениет үйінде ұйымдастырылып, оған шамамен 200 адам қатысты. Тұрғындарға заңдылық, мемлекеттің әлеуметтік жауапкершілігі қағидаттарын нығайту және азаматтардың шешім қабылдау процесіне қатысуын кеңейтуге бағытталған жаңа Конституция нормалары егжей-тегжейлі түсіндірілді.
Нұра кентінде диалог көпсалалы колледж ұжымы мен аудандық медицина қызметкерлерімен жалғасты. Іс-шарада бюджет саласы қызметкерлерінің әлеуметтік қорғалуын кеңейту, шешім қабылдау процесінің ашықтығын арттыру және азаматтардың қоғамдық-саяси өмірдегі рөлін күшейту мәселелері қаралды. Сондай-ақ «Қаратал» КМП ұжымымен кездесу өтті. Оның барысында еңбек және әлеуметтік кепілдіктер, сондай-ақ халықтың реформаларды жүзеге асыру үдерісіне қатысу тетіктері түсіндірілді.
Бұдан кейін Шахтер ауылындағы Мәдениет үйінде «Шахтерский» ЖШС ұжымымен кездесу ұйымдастырылды. Талқылау барысында конституциялық өзгерістер өңірдің тұрақты дамуы мен әлеуметтік тұрақтылығын нығайту үшін маңызды екені айтылды.
Барлық кездесуде қатысушыларға жаңа Конституцияның негізгі нормалары таныстырылып, азаматтардың құқығы мен бостандығын қорғау, мемлекеттік институттардың жауапкершілігін арттыру және басқару жүйесінің ашықтығын қамтамасыз ету мәселелері түсіндірілді. Іс-шаралар ашық форматта өтті – қатысушылар өз сұрақтарын қойып, ойларын ортаға салды, сондай-ақ конституциялық нормаларды іске асыру механизмдерін жетілдіру бойынша ұсыныстарын жеткізді.
«Еңбек ұжымдарымен түсіндіру жұмыстары азаматтарды жаңа конституциялық ережелер туралы хабардар етіп қана қоймай, реформаларды іске асыру кезінде олардың нақты қажеттіліктері мен ұсыныстарын ескеруге мүмкіндік береді. Ашық диалог қоғам мен мемлекет арасындағы сенімді нығайтады», – деді Мәжіліс депутаты Тілектес Адамбеков.
Өз кезегінде Рысқали Әбдікеров референдумға қатысу келісімді нығайтуға ықпал ететінін және облыстың одан әрі дамуына жағдай жасайтынын атап өтті.
«Жаңа Конституцияны қолдау – әрбір азаматтың азаматтық жауапкершілігі мен саналы ұстанымының көрінісі. Елдің болашағын қалыптастыруға референдум арқылы қатысу өңірдің тұрақтылығы мен өркендеуі жолындағы маңызды қадам болатынына сенімдіміз», – деді ол.
Өткізілген кездесулер еңбек ұжымдарын жаңа Конституцияның мақсаттары мен міндеттері туралы хабардар етуге және азаматтар мен мемлекеттік институт өкілдері арасындағы өзара әрекетті нығайтуға ықпал етті. Жалпыұлттық коалиция ел аумағында түсіндіру жұмыстарын жалғастырады.
