KEGOC АҚ-да конституциялық реформа бойынша ақпараттық-түсіндіру кездесуі өтті. Қостанай облысында өткен жиынға кәсіпорын өкілдері мен еңбек ұжымының мүшелері қатысты.
Іс-шараның негізгі мақсаты Конституцияның жаңа жобасында ұсынылып отырған өзгерістердің мәнін түсіндіру, мемлекет пен қоғам арасындағы диалогты нығайту, сондай-ақ стратегиялық шешімдер қабылдауға жұртшылықты мейлінше араластыру болды.
Еңбек ұжымы алдында Жалпыұлттық коалиция мүшесі ҚР Парламенті Мәжілісінің депутаты Екатерина Смышляева және «AMANAT» партиясы Қостанай облыстық филиалының төрағасы, өңірлік коалиция жетекшісі Алмат Досмұхамедов сөз сөйледі.
Екатерина Смышляева өз сөзінде Конституция мемлекеттің даму бағытын айқындайтын негізгі құжат болып қала беретінін және қоғамның цифрлық трансформациясы сияқты заманауи сын-қатерлерді ескеретінін атап өтті. Ол жеке деректерді қорғау, жеке және отбасы құпиясына қол сұқпау кепілдіктерін кеңейтуге ерекше назар аударылғанын айтты.
Депутаттың айтуынша, жаңартылған нормалар банк операцияларының құпиясын, салымдарды және электрондық коммуникацияларды қорғаудың құқықтық тетіктерін күшейтеді. Сондай-ақ, мемлекеттік органдардың жеке деректер саласына араласу шегін нақты айқындайды. Бұл азаматтардың мемлекеттік институттарға деген сенімді нығайтады.
Ал Алмат Досмұхамедов өз кезегінде коалиция мүшелері үшін еңбек ұжымдарымен тікелей диалог орнатуға ерекше назар аударылатынын айтты. Оның пікірінше, азаматтарды маңызды мемлекеттік үдерістер мен реформалар туралы жан-жақты ақпараттандыру – демократиялық институттарды нығайтудың маңызды бөлігі. Ол халық пікірі кез келген өзгерістерді жүзеге асыруда шешуші рөл атқаратынын атап өтті.
Кездесу барысында қатысушылар конституциялық бастамаларды іске асыру, цифрлық қауіпсіздік және азаматтардың құқықтарын қорғау мәселелері бойынша сұрақтар қойды. Ашық формат әркімге өз пікірін білдіруге және өзекті сауалдарға жауап алуға мүмкіндік берді.
Өңірлерде ұйымдастырылып жатқан мұндай кездесулер ашық қоғамдық диалогке деген ұмтылысты байқатады.
