Қызылорда қаласында жаңа Конституция жобасын халыққа түсіндіру жұмыстары қарқынды жүргізілуде. Бүгін «Әділетті және прогрессивті Қазақстанның Халықтық Конституциясы үшін!» өңірлік коалиция мүшелері «Dalatex» тігін фабрикасының еңбек ұжымымен кездесті.
Аталған кәсіпорын – еліміздегі ерлер жейдесін тігетін бірегей өндіріс орындарының бірі. Сонымен қатар, фабрика ірі компаниялармен әріптестік орнатып, арнайы жұмыс киімдерін әзірлеу арқылы отандық өндірістің әлеуетін арттырып, өңір экономикасының тұрақты дамуына үлес қосып отыр.
Кездесуде қалалық коалиция жетекшісі Ибадулла Құттықожаев жаңа Конституция жобасының стратегиялық маңызына тоқталды. Оның айтуынша, құжат елдің ұзақмерзімді дамуына берік құқықтық негіз қалыптастырып, мемлекеттік басқару тиімділігін арттыруға және азаматтардың құқықтары мен бостандықтарын қорғауды жаңа деңгейге көтеруге бағытталған.
«Жобада адам капиталын дамыту басым бағыт ретінде айқындалған. Білім мен ғылымды, инновация мен мәдениетті жүйелі қолдау азаматтардың зияткерлік және әлеуметтік әлеуетін арттыруға негіз болады. Цифрлық құқықтарды, жеке деректерді және зияткерлік меншік институтын конституциялық деңгейде қорғау – құқықтық жүйені заманауи талаптарға бейімдеудің нақты көрінісі. Бұл қадамдар елдің цифрлық экономикаға көшуіне берік негіз қалайды», - деді ол.
Өңірлік коалиция мүшесі Пірмұхамед Сыздықов Ата заң жобасында кәсіпкерлікті қолдау тетіктеріне назар аударылғанын атап өтті. Оның пікірінше, тігін өндірісі сияқты салаларды дамыту – экономиканы әртараптандырудың тиімді жолы. Кәсіпкерлікті ынталандыру, жаңа жұмыс орындарын ашу және халық табысын арттыру негізгі басымдықтардың қатарында.
Іс-шараға өңірлік коалиция өкілдері Абайбек Жүнісов, Майра Боранбаева, Арайлым Байжігітова және Руслан Ізтілеуов қатысып, Конституция жобасының негізгі басымдықтарын жан-жақты түсіндірді.
Кездесу соңында фабрика ұжымы елдің басты құжаты жобасымен таныс екендерін айтып, өз пікірлерін білдірді. Мәселен, Жадыра Бұтабекова жаңа Конституцияны – әрбір еңбек адамының құқығын қорғап, адал еңбектің бағалануына берік негіз болады деп санайды. Осылайша ашық форматта өткен диалог еңбек адамдарының ел болашағына жауапкершілікпен қарайтынын көрсетіп отыр.
