Солтүстік Қазақстан облысының Қызылжар ауданында «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері тұрғындармен ашық диалог құрып, жаңа Конституциядағы өзгерістердің жастар мүмкіндіктеріне, бизнестің дамуына және ауыл экономикасының тұрақтылығына ықпалын саралады.
Алғашқы кездесу Бескөл ауылындағы «Қызылжар» дене шынықтыру-сауықтыру кешенінде өтті. Мұнда ондаған спорт секциялары жұмыс істеп, күн сайын жүздеген бала мен жасөспірім жаттығады. Олимпиада чемпионы Александр Винокуровтың туған өлкесінде спортты дамыту ерекше маңызға ие. Сондықтан спортшылар мен жаттықтырушылар жастардың болашағы, инфрақұрылымды жетілдіру және өзін-өзі жүзеге асыру мүмкіндіктері жөніндегі мәселелерді талқылады.
«Ата заңды талқылау барысында біз бүгінгі балалар мен жасөспірімдер өмір сүретін қағидаларға көңіл бөлеміз. Спортты дамыту, әлеуметтік инфрақұрылымның қолжетімділігі, тең бастапқы мүмкіндіктер – бұның бәрі болашақтың сапасын анықтайды. Конституция адам мен оның әлеуетін басты құндылық ретінде қарастыратын даму бағытын белгілейді», – деді сенатор Әсем Рахметова.
Аудандық мәдениет үйіндегі кездесуде тұрғындар бюджет қаражатының бөлінуі, жергілікті бағдарламалардың тиімділігі және азаматтардың шешім қабылдау үдерісіне қатысуы мәселелерін көтерді. Коалиция мүшесі, облыстық мәслихаттың тұрақты комиссия төрағасы Сәуле Сұрағанова қаржылық тәртіп пен басқарудың ашықтығына ерекше назар аударды.
«Жаңа конституция бюджет үдерістерінің түсініктілігін және әрбір қабылданған шешім үшін жауапкершілікті қамтамасыз етуі тиіс. Конституциялық нормалар билік органдары ашық әрі нәтижелі әрекет етуге міндетті болатын құқықтық шеңберді қалыптастырады. Аудандар үшін бұл бақылаудың күшеюі мен басқару шешімдерінің сапасын арттыруды білдіреді», – деді ол.
Келесі кездесу металлопластикалық бұйымдар мен қайталама шикізатты өңдейтін «Радуга» ЖШС-інде өтті. Өңірдегі қарқынды дамып келе жатқан кәсіпорындардың бірі саналатын бұл өндіріс ошағы облыс орталығына жақын орналасқандықтан жаңа жұмыс орындары ашылып, қайта өңдеу көлемі артуда.
«Экономиканың тұрақтылығы жергілікті өндірістерді қолдауға тікелей байланысты. Заманауи кәсіпорын – бұл адамдар, жұмыспен қамту, жергілікті бюджетке түсетін салықтар және инфрақұрылымның дамуы. Конституциялық реформа кәсіпкерлік бастаманы қорғау және бизнес үшін тең жағдай жасау қағидаттарын бекітеді. Бұл өндірістің ұзақ мерзімді даму жоспарын сенімді құруға мүмкіндік береді», – деді Жалпыұлттық коалициясының мүшесі Қанат Айтбаев.
Жұмыс сапары Чапаево ауылындағы «Қызылжар сүт» тауарлы-сүт фермасында өткен кездесумен қорытындыланды. Ауданның жас әрі қарқынды дамып келе жатқан аграрлық нысандарының бірі саналатын бұл кәсіпорында ондаған адам еңбек етеді. Мал шаруашылығы дамып, өңірдің азық-түлік базасы қалыптасуда. Коалиция өкілі Дмитрий Подковыров аграрлық сектордың өңірлік тұрақтылықтағы маңызын атап өтті.
«Ауыл шаруашылығы – азық-түлік тәуелсіздігінің және ауылдардың тұрақты дамуының негізі. Конституциялық қағидаттар өндірушілерді қолдауды, қызметкерлерге кепілдіктер беруді және саланы жаңғырту үшін ұзақ мерзімді жағдай қалыптастыруды қамтамасыз етуі тиіс. Тек жүйелі тәсіл ғана аграрлық секторды күрт өзгерістер мен тәуекелдерден сақтай алады», – деді ол.
Айта кетейік, Қызылжар ауданының тұрғындары реформаны талқылауға ерекше қызығушылық танытты. Әсіресе жастарды дамыту және агробизнесті қолдау мәселелері ауыл тұрғындарының назарында болды. Коалиция мүшелерінің пікірінше, осындай көпқырлы әрі мазмұнды диалог жаңа Конституция жобасын ауданның нақты міндеттері мен болашақ даму перспективалары тұрғысынан қарастыруға мүмкіндік берді.
